O pasado xoves 3 de xullo, a Oficina Móbil de Retorno da Xunta de Galicia estivo instalada no Campo da Feira da Castellana, no Concello de Aranga, co obxectivo de asesorar e axilizar trámites ás persoas retornadas á nosa terra e ás súas familias.
A visita contou coa presenza da Delegada Territorial da Xunta de Galicia , Belén Docampo, acompañada polo Alcalde de Aranga, Alberto Platas, quen destacou a utilidade desta iniciativa para achegar os servizos da administración a quen máis o precisa.
Este dispositivo, promovido pola Secretaría Xeral da Emigración, permite ofrecer información, orientación e axuda personalizada sobre temas como:
-
Trámites administrativos de retorno
-
Axudas e subvencións dispoñibles
-
Inserción laboral
-
Recoñecemento de títulos ou estudos
-
Atención sanitaria e servizos sociais
A Oficina Móbil forma parte da estratexia da Xunta para facilitar o regreso de galegos e galegas do exterior, promovendo unha acollida digna, áxil e eficiente, cun acompañamento integral no proceso de retorno.
Desde o Concello de Aranga agradecemos á Xunta esta visita e animamos a todas as persoas retornadas a aproveitar este recurso cando estea dispoñible nas distintas localidades.
